Viðskiptaskilmálar

Seljandi

Sér Tækni ehf. er seljandi allra vara í vefversluninni.

Nafn

Sér Tækni ehf.

Kennitala

470126-2210

Heimilisfang

Síðumúli 1, 108 Reykjavík

Netfang

info@ser.is

Sími

+354 790 0505

Gildissvið

Skilmálarnir gilda um kaup neytenda í vefversluninni. Neytandi er einstaklingur sem kaupir vöru utan atvinnustarfsemi sinnar.

Um kaupin gilda einnig lög nr. 16/2016 um neytendasamninga og lög nr. 48/2003 um neytendakaup. Ekkert í skilmálunum skerðir rétt neytenda samkvæmt lögum.

Um kaup fyrirtækja gilda sérstakir skilmálar neðst á síðunni.

Pöntun og samningur

Samningur kemst á þegar greiðsla hefur verið staðfest og við höfum sent staðfestingu á pöntuninni í tölvupósti.

Ef vara reynist uppseld eða verð hefur verið rangt skráð getum við hætt við pöntunina. Þá látum við þig vita og endurgreiðum að fullu.

Verð

Öll verð í vefversluninni eru í íslenskum krónum og með 24 % virðisaukaskatti. Sendingarkostnaður fer eftir afhendingarmáta og kemur fram í kassanum áður en greitt er.

Verð geta breyst. Pöntun er afgreidd á því verði sem gilti þegar hún var gerð.

Greiðsla

Greitt er með greiðslukorti á öruggri greiðslusíðu Straums. Kortaupplýsingar fara aldrei um vefinn okkar og við geymum þær ekki.

Pöntun er ekki afgreidd fyrr en greiðsla hefur borist. Fyrirtæki í reikningsviðskiptum geta greitt gegn reikningi, sjá kaflann um fyrirtæki.

Afhending

Hægt er að velja um eftirfarandi afhendingarmáta. Í kassanum sést hvaða leiðir eru í boði fyrir pöntunina og hvað þær kosta.

Dropp

Pöntunin er afhent á afhendingarstað Dropp eða heim að dyrum á þeim svæðum sem Dropp þjónar.

Pósturinn

Pöntunin er afhent í póstbox, pakkaport eða heim að dyrum.

Sótt í Síðumúla 1

Sótt til Sér Tækni ehf. að Síðumúla 1, 108 Reykjavík. Við látum vita þegar pöntunin er tilbúin.

Áhættan af vörunni flyst til þín þegar þú eða sá sem þú tilnefnir hefur tekið við henni.

Afhendingartími

Við afgreiðum pantanir eins fljótt og hægt er eftir að greiðsla hefur borist. Við það bætist afhendingartími flutningsaðila, sem fer eftir afhendingarmáta og áfangastað.

Hafi ekki verið samið um annað afhendum við vöruna án ástæðulausrar tafar og eigi síðar en 30 dögum eftir að samningur komst á. Ef afhending tefst látum við þig vita. Þú getur þá fallið frá kaupunum og fengið fulla endurgreiðslu.

Réttur til að falla frá samningi

Samkvæmt lögum nr. 16/2016 um neytendasamninga getur neytandi fallið frá kaupum í vefversluninni innan 14 daga án þess að tilgreina ástæðu. Fresturinn hefst daginn sem þú eða sá sem þú tilnefnir tekur við vörunni.

Til að falla frá samningi sendir þú okkur skýra yfirlýsingu um það áður en fresturinn rennur út, til dæmis tölvupóst á info@ser.is. Gott er að láta pöntunarnúmerið fylgja.

Skila skal vörunni án ástæðulausrar tafar og eigi síðar en 14 dögum eftir að þú tilkynntir okkur að þú féllir frá samningi. Þú berð beinan kostnað af því að skila vörunni.

Við endurgreiðum allt sem þú greiddir vegna kaupanna, einnig sendingarkostnað, án ástæðulausrar tafar og eigi síðar en 14 dögum eftir að tilkynningin barst okkur. Hafir þú valið dýrari afhendingarmáta en ódýrasta staðlaða mátann sem við bjóðum endurgreiðum við ekki mismuninn. Endurgreitt er með sama greiðslumáta og notaður var. Við megum bíða með endurgreiðslu þar til varan hefur borist okkur eða þú hefur sýnt fram á að hún hafi verið send.

Þú berð ábyrgð á rýrnun á verðgildi vörunnar sem stafar af annarri meðferð en þarf til að kanna eðli hennar, eiginleika og virkni.

Undantekningar

Rétturinn til að falla frá samningi gildir meðal annars ekki um:

• innsiglaðar vörur sem ekki er hægt að skila af heilsuverndar- eða hreinlætisástæðum ef innsiglið hefur verið rofið eftir afhendingu, til dæmis opnaðar umbúðir efnavöru;
• vörur sem eru framleiddar eftir forskrift neytanda eða sérsniðnar að þörfum hans;
• vörur sem geta skemmst eða runnið út á skömmum tíma;
• vörur sem hafa eftir afhendingu blandast öðrum hlutum þannig að ekki er hægt að aðskilja þær.

Skil

Óopnaðri vöru í upprunalegum umbúðum má skila innan 14 daga eins og lýst er hér að framan. Hafðu samband á info@ser.is áður en þú sendir vöru til baka svo að við getum tekið á móti henni.

Gallar og kvartanir

Um galla fer samkvæmt lögum nr. 48/2003 um neytendakaup. Ef vara er gölluð getur þú krafist úrbóta, nýrrar afhendingar, afsláttar eða riftunar og eftir atvikum skaðabóta.

Tilkynntu galla innan hæfilegs tíma eftir að þú varðst hans var. Tilkynning sem berst innan tveggja mánaða telst alltaf hafa borist í tæka tíð. Kvörtunarfrestur er tvö ár frá því að þú tókst við vörunni.

Sendu kvörtun á info@ser.is eða hringdu í síma +354 790 0505. Lýstu gallanum, láttu pöntunarnúmerið fylgja og mynd ef við á.

Vara telst ekki gölluð þótt hún skili ekki tilætluðum árangri ef hún var ekki notuð samkvæmt leiðbeiningum framleiðanda eða á yfirborð sem hún er ekki ætluð fyrir.

Öryggi vöru

Lestu öryggisblað (SDS) og tæknilýsingu (TDS) vörunnar fyrir notkun og fylgdu leiðbeiningum á umbúðum. Skjölin eru opin öllum á síðunni Skjöl.

Sumar vörur eru flokkaðar sem eldfimir vökvar (flokkur 3) í flutningi. Um flutning þeirra gilda reglur um hættulegan varning og flutningsaðilar geta takmarkað magn eða afhendingarmáta. Þá getum við þurft að bjóða aðeins tiltekna afhendingarmáta, til dæmis að varan sé sótt í Síðumúla 1. Annars höfum við samband og finnum aðra lausn.

Persónuupplýsingar

Um meðferð persónuupplýsinga fer samkvæmt persónuverndarstefnu okkar.

Persónuverndarstefna

Lög og úrlausn ágreinings

Um skilmálana og kaup í vefversluninni gilda íslensk lög.

Ef ágreiningur rís reynum við fyrst að leysa hann með samkomulagi. Neytandi getur einnig lagt mál fyrir Kærunefnd vöru- og þjónustukaupa.

Mál sem rísa vegna kaupanna má reka fyrir Héraðsdómi Reykjavíkur.

Breytingar á skilmálum

Við getum breytt skilmálunum. Um hver kaup gilda þeir skilmálar sem voru birtir þegar pöntun var gerð.

Viðskiptaskilmálar fyrirtækja (B2B)

Þessi kafli gildir um kaup fyrirtækja og annarra lögaðila, hvort sem þau fara fram á fyrirtækjasvæðinu, með tilboði eða í vefversluninni. Um þau gilda lög nr. 50/2000 um lausafjárkaup en ekki lög um neytendakaup og neytendasamninga, og rétturinn til að falla frá samningi á ekki við. Að öðru leyti gilda almennu skilmálarnir hér að framan.

Verð

Verð til fyrirtækja eru án virðisaukaskatts og fara eftir verðflokki fyrirtækisins. Virðisaukaskattur bætist við á reikningi.

Reikningsviðskipti

Fyrirtæki sem hafa fengið samþykkt reikningsviðskipti geta pantað gegn reikningi. Gjalddagi er 15 dögum eftir útgáfu reiknings nema um annað sé samið skriflega.

Dráttarvextir

Sé reikningur ekki greiddur á gjalddaga reiknast dráttarvextir samkvæmt lögum nr. 38/2001 um vexti og verðtryggingu frá gjalddaga til greiðsludags.

Eignarréttarfyrirvari

Seld vara er eign Sér Tækni ehf. þar til hún hefur verið greidd að fullu.

Tilboð

Tilboð gildir til þess dags sem í því stendur. Tilboð verður að samningi þegar viðskiptavinur samþykkir það innan gildistímans.

Vörur gegn tilboði

Sumar vörur eru aðeins seldar gegn tilboði og eru ekki keyptar í vefversluninni. Um verð þeirra og afhendingu fer eftir tilboðinu.

Graffiti Remover

Graffiti Remover er kerfisvara sem er ætluð fyrir yfirborð sem hefur verið varið með veggjakrotsvörn frá Nanoman. Sér Tækni ehf. ber ekki ábyrgð á tjóni sem hlýst af notkun vörunnar á yfirborð án slíkrar varnar.

Afhending

Auk afhendingarmáta vefverslunarinnar getur Sér Tækni ehf. afhent fyrirtækjum vörur sjálf eftir samkomulagi.

Gallar

Fyrirtæki skal skoða vöru við móttöku og tilkynna galla án ástæðulausrar tafar.